Талдықорған қаласының «Өркен» спорт кешенінде бокстан 2008-2009 жылғы жастар арасында «Жетісу Кубогі» ХХІІ халықаралық турнир жалауын желбіретті. Байрақты бәсекеге Өзбекстаннан және Алматы, Шымкент, Астана қалаларынан, сондай-ақ Павлодар, Түркістан, Жамбыл, Солтүстік Қазақстан, Ақмола, Алматы, Қарағанды, Атырау және Жетісу облыстарынан келген 180 спортшылар бақ сынап, 11 салмақ дәрежесі бойынша үздіктерді анықтайды.
Турнирдің басты мақсаты — жас спортшылардың шеберлігін арттырып, болашақ чемпиондарды анықтау. Сонымен қатар, халықаралық дәрежеде тәжірибе алмасу, олимпиадалық спорт түрін насихаттау да жарыстың негізгі міндеттерінің бірі.
Айта кетсек, жарыс 4 күнге созылады. Жарыстың финалдық бәсекесі 18 қазанда өтеді. Жеңімпаздар мен жүлдегерлерге медальдар, кубоктар және арнайы сыйлықтар табысталмақ. Сонымен қатар, «Үздік боксшы», «Үздік төреші», «Үздік бапкер» номинациялары бойынша да марапаттар қарастырылған.