Өңірде бұқаралық спортты дамыту бойынша ауқымды жұмыстар жалғасуда. Жыл басынан бері ауылдық эстафеталардан бастап халықаралық турнирлерге дейін 4 мыңнан астам шара өткізілді. Олимпиадалық, олимпиадалық емес және ұлттық спорт түрлерін дамытуға ерекше мән берілуде.
Жаңартылған заңнамаға және салалық министрліктің 2026 жылғы 20 шілдедегі бұйрығына сәйкес балалар мен жасөспірімдер спорт мектептерін (БЖСМ) жан басына шаққандағы нормативтік қаржыландыруға көшіру саланы жаңғыртудың маңызды қадамы болды. Енді бюджет қаражаты білім алушылардың нақты санына байланысты жан басына шаққандағы нормативтік қаржыландыру бойынша қатаң түрде бөлінеді.
Бюджет қаражатының жұмсалу ашықтығын қамтамасыз ету үшін деректердің қайталануын болдырмайтын цифрлық платформа енгізілуде, ал спорт мектептеріне қабылдау «e-Gov» порталы арқылы жалғасады. Жетісу облысының дене шынықтыру және спорт басқармасы ата-аналарды балалардың құжаттарын уақтылы өзектендіруге шақырады. Енгізіліп жатқан реформалар мемлекеттік қызметтердің сапасын арттыруға және әрбір бала үшін тең мүмкіндіктер жасауға бағытталған.
Сонымен қатар Жетісу облысынан бірден 11 спортшы 2026 жылы өтетін XX Азия ойындарына қатысу үшін Қазақстан құрамасының негізгі құрамына кірді. Қатысушылар спорттың 6 түрінен – ауыр және жеңіл атлетика, садақ ату, велоспорт, спортық құзға шығу мен көгалдағы хоккейден бақ сынайды.
Биылғы маусым Жетісу спортшылары үшін табысты өтуде. Ересектер арасындағы велоспорттан Азия чемпионатында Евгений Федоров алтын, ал Денис Сергиенко күміс жүлде жеңіп алды. Жасөспірімдер арасында Әйгерім Смаилканова Азия чемпионы атанды.
Сондай-ақ өңірдің тағы 9 спортшысы регби мен волейболдан ұлттық құрамаға кандидаттар тізіміне енгізілді. Олардың Азиадаға қатысуы тамыз айының соңында аяқталатын іріктеу жарыстарының қорытындысы бойынша анықталады.