Жетісу облысында I тоқсанда тұтынушыларға 3 млн теңгеден астам қаражат қайтарылды

2026 жылдың бірінші тоқсанында Жетісу облысы бойынша Сауда және тұтынушылардың құқықтарын қорғау департаменті азаматтардың заңды мүдделерін қорғау бағытында жоғары белсенділік танытты. Есепті кезеңде департаментке түрлі байланыс арналары арқылы, оның ішінде E-өтініш платформасы, ОДО жүйесі, телеграм-бот және «жедел желілер» арқылы 280 өтініш келіп түсті. Қабылданған шаралардың нәтижесінде тұтынушыларға 3 млн теңгеден астам қаражат қайтарылды.
Өтініштердің негізгі бөлігі бөлшек сауда саласына тиесілі болды. Ең жиі кездескен бұзушылықтар тауарларды айырбастаудан негізсіз бас тарту және сапасыз өнімдерді сату. Сонымен қатар тұрғын үй-коммуналдық шаруашылық, тұрмыстық қызмет көрсету және электрондық сауда салаларында да өтініштер тіркелді. Бұл салаларда тұтынушылар қаражатты қайтарудың кешіктірілуі және онлайн-платформалардағы тауар сипаттамаларына сәйкес келмеуі мәселелеріне тап болған.
Жеке кәсіпкерлердің жеке шоттарына мобильді аударымдар жасау мәселесіне ерекше назар аударылуда. Мұндай есеп айырысулар кезінде фискалдық чектің болмауы тұтынушыны сатып алу фактісін дәлелдеу мүмкіндігінен айырады және алдағы уақытта оның құқықтарын қорғауды едәуір қиындатады.