Жастардың құқықтық және қоғамдық сауаттылығын арттыру, сондай-ақ елімізде жүзеге асырылып жатқан жаңа бастамалар мен алдағы реформалардың мазмұнын түсіндіру мақсатында «Reform Hack: Жаңа бастама» тақырыбында дөңгелек үстел өтті. Іс-шараға Авиценна медициналық колледжінің студенттері қатысып, өзекті тақырып бойынша маңызды ақпарат алды.
Аталған кездесу жастар мен сарапшылар арасындағы ашық диалог алаңы ретінде ұйымдастырылды. Шара барысында қатысушылар елімізде жақын арада қабылдануы жоспарланып отырған реформалардың негізгі бағыттары, олардың қоғам дамуына тигізетін ықпалы және жастар үшін маңызы туралы жан-жақты мәліметпен танысты.
Іс-шара аясында арнайы шақырылған сарапшы жаңа реформалардың басты мақсаттары мен міндеттеріне тоқталып, олардың жүзеге асырылу тетіктерін түсіндірді. Сонымен қатар, реформалардың әлеуметтік, экономикалық және қоғамдық өмірге ықпалы туралы пікір білдіріп, студенттердің көкейінде жүрген өзекті сұрақтарына жауап берді.
Кездесу ашық пікірталас форматында өтіп, студенттер өз ойларын ортаға салып, ұсыныстарын білдіріп, қызықтырған тақырыптар бойынша сұрақ қоюға мүмкіндік алды. Мұндай формат жастардың қоғамдық үдерістерге деген қызығушылығын арттырып, олардың белсенді азаматтық ұстанымын қалыптастыруға ықпал етеді.
Шара барысында Авиценна медициналық колледжінің студенттері реформалардың мазмұны мен маңызы туралы кеңінен ақпарат алып, мемлекеттік бастамалар мен қоғамдағы өзгерістерге қатысты өз пікірлерін білдірді. Аталған кездесу жастардың ақпараттық және құқықтық мәдениетін арттыруға, жаңа идеялар мен бастамаларға ашық болуына, сондай-ақ қоғамдағы өзгерістерді дұрыс түсінуіне бағытталған маңызды алаңға айналды.