Көксу ауданындағы елді мекендерді газдандыру жобасы аяқталуда. Бұл туралы Жетісу облысының өңірлік коммуникациялар қызметіндегі брифингте аудан әкімі Дәулет Халелов мәлімдеді. Оның айтуынша, Нәдірізбек және Балпық би ауылдарында газ құбырын салу жұмыстары жыл соңына дейін аяқталмақ. Нысандар пайдалануға берілгеннен кейін аудан толықтай газбен қамтамасыз етіледі.
«Газдандыру мәселесін іс жүзінде аяқтап жатырмыз. Бұл тұрғындардың өмір сапасы мен аумақтың одан әрі дамуы үшін маңызды», – деді аудан әкімі.
Соңғы үш жылда Көксу ауданы экономикасына 39,1 млрд теңге инвестиция тартылған. Оның ішінде шамамен 19 млрд теңге — жеке қаражат есебінен. Биылғы жылдың 10 айының қорытындысы бойынша инвестиция көлемі 17,7 млрд теңгені құрады. Алдағы жылдары 542 жаңа жұмыс орнынан тұратын 7 жобаны жүзеге асыру жоспарлануда.
Дәулет Халеловтың айтуынша, есепті кезеңде өңдеу өнеркәсібінде 28,6 млрд теңгенің өнімдері өндірілген. Жаңа технологияларды енгізу және өндірістік қуаттарды кеңейту жұмыстары жалғасуда.
Ауыл шаруашылығы саласы да өсім көрсетіп отыр. Өндіріс көлемі 30,5 млрд теңгеге жетіп, өткен жылмен салыстырғанда 6,9 пайызға артқан. «Кең Дала-2» бағдарламасы аясында аграрларға 605,8 млн теңге көлемінде жеңілдетілген несиелер берілді. Соңғы үш жылда мемлекет меншігіне 46,9 мың гектар пайдаланылмай жатқан жер қайтарылған, оның 85,7 пайызы қайта айналымға енгізілді.
Жол инфрақұрылымы бойынша биыл 22 шақырым автомобиль жолдары жөнделді. Айнабұлақ ауылындағы көпірді және Алғабас ауылына кірме жолды қайта жаңғырту жобалары жүзеге асырылуда.
«ТКШ саласында 20 пәтерлі қызметтік тұрғын үй пайдалануға берілді. Балпық би ауылында екі 60 пәтерлі үйдің құрылысы жалғасуда, оларды 2026 жылы аяқтау жоспарланған. Аудандағы 34 елді мекеннің барлығы орталықтандырылған ауыз сумен қамтамасыз етілген», — деді Көксу ауданының әкімі.
Соңғы үш жылда 20 әлеуметтік нысан салынған, оның 14-і — денсаулық сақтау саласына тиесілі. Биыл Қызылтоған, Бесқайнар, Жетіжал және Қаратал ауылдарында фельдшерлік-акушерлік пункттер пайдалануға берілді.
Көксу ауданында шағын бизнес те кеңеюде: кәсіпкерлік саласында мыңдаған тұрғын жұмыс істейді. Бюджетке түсімдер өсіп келеді — жыл басынан бері аудан 2 млрд теңгеден астам салық төлеген. Жұмыспен қамту бағдарламасы бойынша көрсеткіштер де орындалып жатыр: жоспарланған жұмыс орындарының басым бөлігі ашылды.
