Жетісу өңірінде онкологиялық ауруларды ерте кезеңде анықтау көрсеткіші артып келеді

Жетісу облысы 2023-2025 жылдарға арналған онкологиялық аурулармен күрес жөніндегі кешенді жоспары іске асырылып жатыр. Оның ішінде қатерлі ісіктердің алдын алу және ерте анықтау шаралары жүргізілуде. Осы тұста өңірде «Тік ішек пен тоқ ішек қатерлі ісігі туралы» ақпараттандыру айлығы өткізілді.
2025 жылдың басында облыста қатерлі ісік бойынша диспансерлік есепте 7000-нан астам науқас тіркелген. Өткен жылдармен салыстырғанда сырқаттанушылықтың 1% өсімі байқалады. Науқастар санының аздап өсуіне қарамастан, өңірде ауруды ерте кезеңде анықтау көрсеткіші артып келеді.
Ауру құрылымында бірінші орында сүт безі қатерлі ісігі (13,7%) одан кейін колоректальды обыр (9,2%), өкпе және бронх қатерлі ісігі (7,9%) тұр.
2024 жылы қатерлі ісікке арналған скринингтік зерттеуден 38 мыңнан астам адам өтті, бұл мақсатты топтың 98 пайызын қамтиды. Нәтижесінде диспансерлік есепке 29 пациент алынды. 108 адамда қатерлі ісік алды патологиялар анықталды, осы кезеңде барлық науқас емделді және толық қалпына келгенге дейін мамандардың бақылауында болды.
Сондай-ақ, жатыр мойны қатерлі ісігіне қарсы скрининг те белсенді жүргізіліп, ауруды ерте кезеңде анықтауға ықпал етуде. Қазіргі уақытта 560 әйел есепте тұр.
Өңірде 2024 жылдың күзінде 11 жастағы қыздарға АПВ-ға қарсы вакцинация басталды. Бұл жатыр мойны қатерлі ісігінің алдын алудағы маңызды қадам. Вакцинация әлемнің 107 елінде, оның ішінде Өзбекстан мен Қырғызстанда да сәтті жүргізілуде.
Онкологиялық аурулармен күресте уақытында дәрігерге қаралу аса маңызды екенін есте ұстауы тиіс дейді. Емханаларда тұрақты тексеруден өтіп, аурудың алғашқы белгілері байқалған жағдайда дереу медициналық көмекке жүгіну қажет. Егер шаршағыштық, әлсіздік, ішектің қалыпты жұмысында өзгерістер, іш қату, нәжісте қан байқалса, дене салмағының төмендеуі немесе іштің ауыруы орын алса, шұғыл түрде дәрігерге қаралу қажет дейді онколог мамандар.