Минус тарифтер мен плюс қайтарымдар: Жетісуда өтемдік тарифтер арқылы тұтынушыларға 8,2 млн теңге қайтарылды

2026 жылы облыста тек инфрақұрылымды жаңартуға ғана емес, халықты қолдауға да басымдық берілуде. Талдықорған қаласы мен аудандарда электр және жылу желілері жаңартылып, сумен жабдықтау жүйелері жөнделіп, тазарту құрылыстары жаңартылуда.
Сонымен қатар, халыққа арналған тарифтер уақытша төмендетілді: су бойынша — 9,1%, газ бойынша — 10,7%. 1 сәуірге дейін сумен және жылумен жабдықтауға арналған әлеуметтік нормаларды қолдану да уақытша тоқтатылды. Маңыздысы, есепті кезеңде тарифтер көтерілген жоқ.
44 табиғи монополия субъектісіне қадағалау жүргізіледі. Осы уақыт аралығында тарифтерді өзгертуге 23 өтініш келіп түсті, олардың бір бөлігі бекітілді, қалғандары қаралу үстінде.
Тұрғындардың өтініштері мен шағымдарына ерекше көңіл бөлінеді. 51 шағымның жартысынан көбі тұтынушылар пайдасына шешілді. Соның нәтижесінде халыққа 8,2 млн теңге қайтарылды.
Санкцияларсыз да болмады: «Жетісу Су Құбыры» 3,46 млн теңге көлемінде айыппұлға тартылды, анықталған бұзушылықтар жойылды.
Облыстағы басты мақсат — тарифтердің бақылаусыз өсуіне жол бермеу және тұтынушылардың құқықтарын қорғау.