Лудоманияның алдын алу және салауатты өмір салтын насихаттау мақсатында Сарқан қаласында колледж студенттері арасында «StudUnion» атты интеллектуалды ойын ұйымдастырылды.
Аталған іс-шараның басты мақсаты — студенттердің зияткерлік әлеуетін арттыру, логикалық және сыни ойлау қабілеттерін дамыту, командалық бірлікті нығайтып, жастардың белсенді азаматтық ұстанымын қалыптастыру.
Зияткерлік додаға 10 команда қатысты, әрқайсысында 5 студенттен құралған. Жалпы саны 50 қатысушы өзара білім мен ой-өріс бәсекесінде бақ сынасты. Ойын 5 кезеңнен тұрды: қатысушыларға тарих, мәдениет, құқық, логика және жалпы білім тақырыптарында түрлі деңгейдегі сұрақтар қойылып, олардың жан-жақты дайындықтары мен тапқырлықтары сынға түсті.
Сайыс қорытындысы бойынша жеңімпаз атанған командалар мен ерекше көзге түскен белсенді қатысушылар арнайы марапаттарға ие болып, оларға танымдық кітаптар сыйға тартылды.
«StudUnion» — тек білім жарысы ғана емес, бұл – жастарды ой еңбегіне баулитын, мәдениет пен білімді дәріптейтін, зиянды әдеттерден аулақ болуға үндейтін, болашағына саналы әрі жауапкершілікпен қарауға жол ашатын маңызды бастама.