Талдықорған қаласындағы «City Plus» сауда-ойын-сауық орталығында «Заң және тәртіп» атты «Ашық есік күні» форматында ақпараттық-түсіндіру іс-шарасы ұйымдастырылды. Іс-шараның басты мақсаты – мемлекеттік органдардың ашықтығын арттыру және тұрғындар үшін құқықтық ақпаратқа қолжетімділікті қамтамасыз ету.
Іс-шараға облыстық және қалалық мемлекеттік мекемелердің өкілдері қатысып, қала тұрғындарына тікелей кеңес беру мүмкіндігі ұсынылды. Қатысушылар әлеуметтік қорғау, тұрғын үй-коммуналдық шаруашылық, білім беру, денсаулық сақтау, жер және еңбек қатынастары, кәсіпкерлік, сондай-ақ мемлекеттік қызметтерді алу тәртібі бойынша ресми түсіндірмелер алды.
Кеңес беру барысында қолданыстағы заңдар, мемлекеттік қызмет көрсету шарттары мен мерзімдері, қажетті құжаттар тізбесі, өтініштерді қарау тәртібі жан-жақты түсіндірілді. Қажет болған жағдайда азаматтарға нақты ұсынымдар мен іс-қимыл алгоритмдері берілді.
Мұндай іс-шаралар мемлекеттік органдар мен халық арасындағы байланыс пен өзара түсіністікті нығайтуға, құқықтық сауаттылықты арттыруға және мемлекеттік басқаруға деген сенімді күшейтуге бағытталған.